Потеклото и традицијата се основа на постоењето на секое битие. Со нивното запознавање се спознаваме самите себеси, нашата култура и живеењето на нашите предци. Културата на живеењето полека но сигурно се повеќе ни наметнува да ја запознаеме и да ја цениме нашата традиција, затоа што сепак и пред нас постоел живот со својствена за него традиција и култура.

Од друга страна современото темпо на живеењето и трагањето по здрав живот не враќа кон природата и нејзините благодети, како и кон еколошки произведена и здрава храна.

20 Јануари - Ратевски карневал “Бамбурци“ На 20 Јануари во с. Ратево се одржува Ратевскиот карневал “Бамбурци“, културна манифестација, која е директно поврзана со верскиот празник “Собор на Свети Јован Крстител“ - Јованден. Покрај традиционалниот настап на “Ратевските бамбурци“,карневалот е збогатен со презентација на други активности, поврзани со традиционалните обичаи во Малешевијата во зимскиот период, како што се:

Обичајот “Најатка“ (донесување дрвце и давање подарок на децата) Обичајот “Прошка“ - голем копен (Стреловиште).

Април - Велигден. Избор на најцврсто и најубаво декорирано јајце. Велигден е христијански празник со големи традиции во општина Берово. Секоја година на Велигден се организира манифестација за избор на најцврсто јајце (качор) и за најубаво украсено јајце. Манифестацијата е збогатена со културно-уметничка програмаци“.

10-18. 08. - Ликовна колонија Берово Ликовната колонија Берово континуирано се организира од 2003 година и има меѓународен карактер, со учество на уметници од Македонија,  Бугарија и Србија. Делата секоја година се изложуваат во Берово, како и  во повеќе градови низ Македонија.

---

23 - 28. 08 - Меѓународен фолклорен фестивал “Малешевски фолклорни средби“. Секоја година во месец август во Берово се организира меѓународен фолклорен фестивал, на кој  домаќин е КУД  “Димитар Беровски“ од Берово, а земаат учество фолкорни состави од Р. Македонија, Р. Бугарија, Р. Србија и пошироко.

23. 08. - Ден на Општина Берово Денот на ослободувањето на Берово е празник кој е проследен со традиционален вечерен концерт, како и низа на културни настани во текот на денот, меѓу кои и изложба на дела од Ликовната колонија.

27 - 28. 08. - Меѓународен саем на традиционални производи “Малешевијата на дланка“ За промоција и доближување до потрошувачите на традиционалните изработки и производи во Берово секоја година на 27 и 28 август се организира меѓународен саем на традиционални производи “Малешевијата на дланка“ На саемот се претставени три сектори: здрава храна, вешти раце и сувенири и резби.

На саемот може да ги вкусите и да купите од прочуените малешевски млечни производи (овчо сирење, биено сирење, кашкавал, урда, кравјо сирење, козјо сирење, матеница и др.), мед и пчелни производи - различни видови мед во зависност од додатоците (ореви, бадеми, лешници) но и лековити пчелни производи (прополис, восок, матичен млеч и др.), диви шумски плодови (капини, малини, јагоди, боровинки, шипинки) и нивните преработки (сок, слатко, компот) но и преработките од сливата, вишната, црешата, аронијата и др., како и компир, грав, тикви, пченка и други локални производи, но и домашна сливова ракија. Меѓународниот саем на традиционални производи е сврзан со празникот Успение на Пресвета Богородица, во народот познат како ГОЛЕМА БОГОРОДИЦА, кој во православниот христијански свет се прославува на 28 ми август.

Октомври   Меѓународно рели со теренски возила На почетокот на октомври, секоја година Берово е домаќин на меѓународно рели со теренски возила. Настанот се организира на месноста Шушлевец, на патека која е специјално подготвена за потребите на релито

11 Октомври - Ден на компирот во Малешевијата. Манифестацијата е со изложбено-продажбен карактер, на која што се претставуваат различните сорти компири и за време на која што можете да дегустирате од локалните специјалитети од компири во комбинација со прочуените малешевско сирење и малешевска сливова ракија.

Декември - Марш од с. Русиново до Петлец По повод одбележувањето на смртта на македонскиот револуционер Дамјан Груев и оддавање чест за неговото дело секоја година се организира марш од с. Русиново до планината Петлец, на местото каде што е убиен во 1906 г.